Part 42
11/28/05
Noj tshais tas, tais hluas, txivhluas, kuv pojniam thiab kuv, peb mus Veescas. Txivhluas tsav tsheb peb mus yuav insurance povhwm lub tsheb wb yuav tso tseg rau gawv. Tus nqi them (premium) ib xyoos raug $50.00.
Tom qab yuav insurance tas, peb mus rau ntawm lawv lub zos Av Liab mus xyuas phauj thiab yawglaws Vamhawj Vaj. (Phauj Nxawm yog kuv txiv tus muam nxawm). Txivhluas gawv tsuas paub kev mus ntawm zos Av Liab xwb. Gawv tsis paub phauj thiab yawglaus chaw nyob.
Av Liab
Thaum peb mus txog lub zos Av Liab, txivhluas mus nug ib yim Hmoob nyob ntawm qab kev (sab xis). Tus yawg Hmoob qhias tias ob tug niamtxiv laus peb nug ntawd nyob rov tom qub qab peb lawm. Dhau ntawm txoj kev tshuam peb tuaj hla rov tom qab.
Peb lem tsheb rov los raws li tus yawg Hmoob qhia. Peb los nres tsheb ntawm ntug kev nug ib yim Hmoob nyob huav ib lub tsev tsavlawj, xov nruab thiab yog chaw muag khoom dog dig nyob sab xis qaum kev. Txivhluas mus nug tus niam tsev hauv. Tomthawj muaj ib tug pojniam Hmoob nhubnyoog kwvyees 25-30 xyoo tuaj ncig txog hauv. Nws nhov peb nug txog ob tug laus ntawd. Nws thiaj los teb hais tias nws yog txwm tub nyab uas saib xyuas ob tug laus ntawd ntag.
Peb sib nug tau qhov tseeb ces tus nyab ntawd nce rau saum peb tsheb. Peb taug ib txoj kev uas tsheb khiav tau, rau sab qab teb nhub tuaj, deb li 100 yards ntawm qhov chaw peb jib nws. Thajtsam ntawd muaj xyoob, ntoo thiab nroj lajkabdais sib xyaws pes daws. Peb mus txog ntawm lawv qhovrooj. Sab nhub tuaj muaj ib lub tsev xov ntoo thiab vov vuas av ci. Sab lauj yog ib lub tsev xov xyoob thiab vov vuas hlau.
Thaum mus nres tsheb, tus pojniam Hmoob nqisphluav tsheb ces nws ua ntej lawm. Tsis tos peb. Peb mam nqis tsheb los xam ua cas tsis pom tus pojniam ntawd qab lawm, tabsis yeej paub tias nws gag los rau hauv lub vajloog lawm. Sawvdaws sib nug thiab tham zomzaws ces tus pojniam Hmoob ntawd thiaj ceev nrooj saum lub tsev lawj tuaj coj thiab qhia thiab tawtes tias yawg laus thiab phauj Vamhawj gawv lub tsev yog lub xov xyoob ntawd. Nws coj peb mus rau hauv phauj gawv tsev. Nws tsis kam coj peb mus rau hauv nws lub tsev lawj xov ntoo thiab.
Thaum peb gag txog hauv tsev, muaj ib tug txivneej Hmoob laus kwvyees li 80-90 xyoo zaum ywb saum txaj. Nws tsis pom kev. Nws nhov peb hais lus xwb. Tsis paub xyov peb yog leejtwg. Kuv twb nco tsis tau tus txivneej Hmoob laus ntawd lawm tias yog yawglaus. Lub txaj muaj ib lub vijtsam dai thaiv yoov. Kuv xav twjywm tias yeej yog yawglaus Vamhawj ntag. Kuv tsis nug.
Muaj ib tug pojniam laus nhubnyoog yuav muaj li 80-90 xyoo zaum ib lub tog ntoo siab li ib dos ntawm ntug cub tig xubntiag tuaj tim qhovrooj, thiab nws mloog xovtoojcua. Nws los tsis pomkev lawm thiab. Kuv xav tias tus ntawd yog phauj Nxawm lawm ntag, tabsis tseeb tsis heev thiab. Kuv jia lub jejmuag muaj tsos zoo li kuv txiv. Kuv xav twjywm tias yeej yog phauj xwb. Kuv tsis tau qhia tias kuv yog leejtwg. Jia phauj rua muagpliav, tabsis nws tsis pom peb thiab tsis paub tias peb yog leejtwg. Tsuas nhov peb tham lus zomzaws xwb. Kuv mus tuav gaus phauj tes ces kuv thiaj nug tias, “Koj puas paub kuv lawm?”
Phauj teb tias, “Kuv tsis paub. Kuv twb tsis pom koj es. Xyov yog leej twg ne. Koj yog kuv tus me Blooj los?”
Kuv teb tias, “Kuv tsis yog koj tus Blooj.” Kuv yuav nug kom nws twv nws niam thiab txiv thiab cov neej nus saib nws puas yog phauj Nxawm tiag. Kuv nug tias, “Koj niam thiab txiv yug koj hu li cas?”
Phauj teb tias, “Kuv txiv yug kuv hu ua Vamtub Vwj.”
Kuv nug tias, “Koj tus dab laug hlob be hu li cas?”
Phauj teb tias, “Kuv tus dab laug hlob hu ua Nyiajvaj. Nws muaj ib lub be hu ua Txawjxwm thiab.”
Kuv nug, “Koj tus dab laug Nyiajvaj tus tub hlob hu li cas, thiab tus tub nxawg yu li cas?”
Plauj teb, “Tus tub hlob hu ua Lwm. Be laus hu ua Vamsawm. Tus tub nxawg hu ua Nuvyis no.”
Kuv hais tias, “Kuv yog Nuvyis tiag.”
(Hauv daim duab, Yawlaus Vamhawj yog tus txivneej laus zaum saum lub txaj sab xis. Phauj Vamhawj (Phauj Nxawm) yog tus pojniam laus zaum ntawm Yawglaus Vajhawj hauvntej).
Phauj tuav gaus kuv tes ruaj^ thiab quaj dhev. Mejis ces nws nug tias, “Ua koj nyab puas los?”
“Nyab nyob qhov no.” Kuv teb thiab muab Phauj txhais tes los tuav kuv pojniam ob txhais tes.
Peb sib tham li 30 nasthi xwb ces phauj qhia peb tias tsis ntev dhau los no neeg nyiag phauj 600,000 kis lawm. Peb muab sib nug xyuas tus xwmtxheej qho mejis mas nxim yog cov neeg paub gawv nyiag xwb. Tsis paub yuav hais li cas.
Peb sib tham ntev li 1 xuajmoo ces peb yuav rov los lawm KM-52. Wb muab tau 500,000 Kis thiab $50 tseg rau phauj thiab yawglaus gawv taus siv. Wb hais lus tseg tias kom phauj gawv muab gawv cov nyiaj rau tus tub thiab nyab khaws es thiaj tsis muaj neeg nyiag lawm. Tas lintawd ces peb nce tsheb rov los rau KM-52.
Phauj thiab yawg laus gawv laus heev lawm lau. Yawg laus ces tshuav tawv qhwv txha xwb. Phauj los dig muag tag thiab yuag kawg. Tam jia mas qhov gawv yuag yog tim los ntawm qhov tau noj tsis txaus thiab txoj kev laus ntag.
Hauv yus lub siab xav, txawm muab nyiaj rau leej twg khaws los yeej tsis paub tias luag lub siab yuav dawb baum li cas. Luag siv tsawg los hais tias siv ntau. Thaum nyiaj tas lawm ces muaj tseeb tsis tseeb los tsis pom qab hais li cas. Peb tham xaus lus ces peb rov los KM-52 lawm. (Tus nyab saib xyuas ob tug laus yog tus tabtom nqa lub rooj hauv daim duab no). (Part 42 ends)