“Lub Neej Ntsuag Caum Tsis Cuag Luag”

“Lub Neej Ntsuag Caum Tsis Cuag Luag”

Lub neej ntsuag ua neej yeej caum tsis cuag luag
Ua lub neej siv siv zog khwv los haj tseem pluag
Yuav mus thov leej twg pab los so yus lub kua muag
Ntshe ua neej nyob yuav tu siab mus txog hnub tuag
Ua neej nyob tsis muaj leej twg pab txhawb lub neej
Ntshe yuav mus nyob tom hav zoov ua neeg twm zeej
Mam li ua ib siab mus ua yus lub neej ntawm tus kheej
Saib yus txoj kev ntshaw puas muaj hnub ua lub neej tsheej
Txoj kev ua ntsuag yog yam uas tu siab heev li
Ua lub neej ces yuav nyob tsaus ntuj li nti
Yam li tauv huab dub los roos kiag lub hli
Ua neej nyob tsis muaj hnub yuav luag li ntxhi
Puas yuav maj leej twg paub thiab nkag siab txog
Ua neej nyob zoo li no puas yuav tsim nyog
Puas yuav muaj leej twg los pab txhawb lub zog
Thaum muaj neeg cem puas muaj leejtwg pab tuaj yus tog
Xav kom ua neej nyob es txhob muaj txoj kev tuag
Muaj niam muaj txiv los pab so yus lub kua muag
Ntshe yuav ua neej yuav tsis muaj hnub ntshaw luag
Ua neej thiaj yuav tsis muaj hnub tau ua ntsuag
Neej ntsuag nos li kuv no luag tej ntxhais puas yuav nyiam
Puas yuav muaj ib hnub yuav tau nrog luag muaj pojniam
Yog muaj ib hnub tau nyab lawm puas muaj leejtwg pab tiam
Vim ua neej nyob tiam no twb tsis nrog luag muaj niam
Ua neej ntsuag xwb ces luag tej yeej ua saib tsis taus
Es xyov yuav ua li cas thiaj ua lub neej mus txog hnub laus
Ib lub xyoo tshiab tsis muaj leej twg tuaj hu yus mus noj mus haus
Yus yog neeg txom nyem ua zoo npaum li cas los yeej tsis txaus
Ib txoj hau kev lawm xwb uas tub ntsuag yuav tau ua
Nws yog txoj kev kawm kom paub txhij paub txhua
Saib puas muaj hnub txoj kev nyuaj siab no ho dua
Txoj kev nyuaj siab no puas yuav dhau mus yam ntwg cua
Thiaj ua siab kawm txawm txom nyem npaum cas los xij
Mam ua siab ntev kawm kom kuv no ho paub txhij
Muaj ib hnub yus tus kheej thiaj li yuav tshaj lij
Thaum ntawv yus lub neej thiaj li yuav npaj txhij
By: Xeeb Pov Lauj

Ua tsaug rau koj txoj paj huam nawb,

lub forum nov ce ntev lo tau ntau lub xyoo lawm twb tsi muaj neeg tuaj ua si sau ntawv rau hauv nov li lawm os. Kuv lo twb nkag mus kho tsi tau lawm vim lawv tus tswv website muab kuv cov gallery block tag kuv mus update tsi tau lawm e kuv thiaj li nyob li nov lawm xwb os.

Thank you for visiting