Sau Paj Huam(Poem) Ua Si

Chang Gi Mai Mai wrote:Hj

Davdub wrote:Ua tsaug kwv Tas Lauv

Koj sau tau zoo kawg li lawm os. Xav hai tias NkaujHnubqub yeej tuaj kawg tab si nws tsi sau lus xwb. Yeej meem sau tseg rau hauv nov es peb thiaj li muaj lub idea lo kawm sau  yog  tsi paub sau ces saib koj cov los ua piv txwv ces yeej yuav sau tau  xwb.

Ua tsaug os.

Nraug Cuam wrote:

Cev Ntaj Ntsug Laus Lawm Zuj Zus

 

Ntuj yuas lawv----------cov zoo phooj ywg

Nej leej twg----------puas thooj li kuv

Cas peb yug----------los ua neeg nyob

Zoo tam kob----------nag tshia 1 vuag

Twb laus cuag----------yus niam yus txiv

Peb los chiv----------ua neeg 1 zaug

Kev nkauj nraug----------twb muaj tsis txaus

Cas twb laus----------nkag nkuj nkoos lawm

Cas sij hawm----------nim ya tshuj tshaws

Nej sawv daws----------puas thooj kuv thiab

Kuv lub siab----------yeej mob khis rhe

Thaum yus me----------nyob niam xub ntiag

Zoo tiag tiag----------tsis paub nyuaj siab

Zaum nqaws tiab----------noj niam lub mis

Ib pliag ntshis----------twb tiav nkauj nraug

Twb pib taug----------niam txiv tus hneev

Siab tsis kheev----------thaum tig saib iav

Cas ua ciav----------twb laus zuj zus

Tig rov mus----------saib thaum tseem hluas

Nplooj siab mluas----------rau cev ntaj ntsug

Mob khoob lug----------hauv kuv nplooj siab

Kua muag iab----------ntws yaws sis lug

Cev ntaj ntsug----------laus lawm zuj zus

Siab puas tsus----------mob cuag riam chob

Ua neej nyob----------zoo li npau suav

Nyob tsis dhuav----------nrog lub ntiaj teb

Nej thiab peb----------txawm siv laus lawm

Muam nkauj ntxawm----------thiab leej tub ntxawg

Zoo nraug kawg----------yav ntuj thaum hluas

Lub cev puas----------laus lawm tuj tiag

Nkauj cev yiag----------nyias npaum nplooj nqeeb

Txhua tus txeeb----------xav tau los puag

Cas 1 vuag----------zoo li npau ntub

Txoj kev hlub----------txawm siv yuav dua

Zoo tam ntua----------li tus dej ntws

Ntws sib zws----------tsis muaj hnub rov

Kev hlub khov----------ruaj cuag caj zeb

Los kawg peb----------yuav tau tso cia

Kev mob ntxhia----------nrog sib puag ntub

Tus peb hlub----------los yuav tau ncaim

Siab qaug laim----------tsis xav ncaim hlo

Sim neej no----------tu siab tshaj plaws

Nej sawv daws----------puas tu siab thiab

Kuv nplooj siab----------twb tu los ntev

Vim lub cev----------ntaj ntsug laus zus

Tsis xav mus----------nyob lawm ntuj tsaus

Lub cev laus---------yam cheem tsis tau

Mob siab dhau----------tsis paub ua cas

Ntawm nej mas----------kuv tsis paub hlo

Hos kuv no----------ces tsis tsim nyog

Niam lub zog----------pub mis kuv noj

Tu kuv loj----------tiav txiv neej hlo

Vim kuv no----------yog neeg  ruam qauj

Tsis tau pauj----------niam txiv txiaj ntsim

Tsis tau tsim----------muaj koob nto npe

Tsis tau qhe----------coob leej ntau tus

Tsis tau mus----------ua nom ua tswv

Tsis tau khwv----------muaj txiaj nplua nuj

Kev hlub kuj----------ntsib tsis tau txaus

Kev noj haus----------los saj tsis txhua

Tshuav ntau pua----------ntau phav tsav yam

Tsis tau qam----------noj txhua haus txhij

Kev kwv tij----------kev neej kev tsav

Los tsis kav----------sib pab tsis txhua

Kev ua qhua----------tsham teb ncig chaw

Me ntaub ntaw----------los tsis tau kawm

Hmoov tsis sawm----------tau neej lwj siab

Tsev teeb liab----------los tsis tau pom

Txaj chaw khom----------zoo tam zes npua

Kev ua qhua----------tsab zag seev yees

Tej chaw plees----------los pom tsis txhij

Cov kwv tij----------nkauj muam nraug nus

Nej txhua tus----------ho xav li cas?

Kuv no mas----------tsis tsim nyog hlo

Ntshe tiam no----------tuag tsis qi muag

Tsis xav tuag----------qi muag ncaim mus

Laus zuj zus----------yam cheem tsis tau

Zaum tsaws npau----------thiab yws daws dom

Niag tsov tom----------hmoov phem khib xuab

Neeg vuab tsuab----------neeg lwj neeg liam

Thov lwm tiam----------kom muaj txoj hmoo

Los thawj loo----------ua neeg tsim txiaj

Es kuv thiaj-----------yuav zoo siab tuag

Qi qhov muag----------ncaim  ntiaj teb no

Zoo siab tso----------txhua yam tom qab

Mus kab ntsab----------nce lawm ntuj kag

Xwb tiag ntag phooj ywg law e.

Ua tsaug.

  Zoo kawg li os bro, koj zaj paj huam no mas hais tau raug lub ntsiab thiab lub (topic) kawg nawb, tsis tag li ntawd koj tseem hais tau ntau fab los sib xyaws thiab,,,koj txawj sau kawg os bro...thumbs up! Thov qhuas os.