Would you like to react to this message? Create an account in a few clicks or log in to continue.


    zaj tshoob

    avatar
    Hmoob nt
    Guest


    zaj tshoob  Empty zaj tshoob

    Post by Hmoob nt May 30th 2011, 8:07 pm

    ( 1 )- . Nqe
    lus ua zaj hais fi xov rau niam txiv nyab neej nus



    1,
    Hais zoov li kus, zoov li, zaj npuas phwb lawm toj tsuas, phwb nuj nuag twv av
    mus lawm luaj dub, kuv niam kuv txiv nyab neej nus nej nyob ntuj tag hmo teb
    tag hnub, nej tsuas noj sib nco haus lawm sib hlub, nej tsuas tsis paub os me
    tub nraug laj twb tuaj coj tau nej me ntxhais nkauj mog mim mus lawm tej mus
    nrab hnub, dua ntais ntuj sua teb nram ub, mus ciaj tas me tub nraug laj  lawm niaj ib tug mus zoo hlub, nes,


    1,
    Hais zoov li kus, zoov li, zaj npuas phwb lawm toj tsuas, phwb nuj nuag twv av
    mus lawm luaj txho, kuv niam kuv txiv nyab neej nus nej nyob ntuj tag hnub teb
    tag hmo, nej tsuas noj sib hlub haus lawm sib nco, nej tsuas tsis paub os me
    tub nraug laj twb tuaj coj tau nej me ntxhais nkauj mog mim mus lawm tej mus
    nrab hmo, dua ntais ntuj sua teb nram tog, mus ciaj tas me tub nraug laj  lawm niaj ib tug mus zoo nco, nes,


    2,
    Hais Zoo li kus, zoo li, kuv niam kuv txiv nyab neej nus nej me ntxhais nkauj
    mog mim ces ploj li ntshis rau lawm tej mus yas kab, ces twb yog lawm me tub
    nraug laj tuaj coj tau nej me ntxhais nkauj mog mim mus lawm lub hli nrab, mus
    ciaj tau lawm me tub nraug laj  ib tug
    mus zoo nyab, mus nrog me tub nraug laj muab lub cuab tuaj lawm lub yig nrog
    luag tab, nes.


    2,
    Hais Zoo li kus, zoo li, kuv niam kuv txiv nyab neej nus nej me ntxhais nkauj
    mog mim ces ploj li ntshis rau lawm tej mus yas kev, ces twb yog lawm me tub
    nraug laj tuaj coj tau nej me ntxhais nkauj mog mim mus lawm lub hli ntev, mus
    ciaj tau lawm me tub nraug laj  ib tug
    mus zoo sev, mus nrog me tub nraug laj muab lub cuab tuaj lawm lub yig nrog
    luag leg, nes.


    3,
    Hais Zoo li kus, zoo li, kuv niam kuv txiv Hmoob poj yawm tom ub me tub nraug
    laj ces coj tau lawm kuv niam kuv txiv nyab neej nus nej me ntxhais nkauj mog
    mim mus ua neej yaj los kib txoob, ib nqaj nto ntuj, ib nploog nto ntsis, mus
    ntxuav qab yias du, cheb lawm qab plag tsev qawj, es hais rau kuv niam kuv txiv
    nyab neej nus nej nyob nej tsis txhob txhawj, mog ces kaj ntug tag kis kaj es kaj
    li zus tuaj peb tag kis tawm,  ces kuv
    niam kuv txiv hmoob poj yawm tom ub li rov coj tau kuv niam kuv txiv nyab neej
    nus nej me ntxhais nkauj mog mim tuaj nrog nej ntsuas dej kus ntsuas cawv, nes,


    3,
    Hais Zoo li kus, zoo li, kuv niam kuv txiv Hmoob poj yawm tom ub me tub nraug
    laj ces coj tau lawm kuv niam kuv txiv nyab neej nus nej me ntxhais nkauj mog
    mim mus ua neej yaj los kib txoob, ib nqaj nto ntuj, ib nploog nto ntsis, mus
    cheb qab plag tsev qawj, ntxuav lawm qab yias du, es hais rau kuv niam kuv txiv
    nyab neej nus nej nyob nej tsis txhob hu, mog ces kaj ntug tag kis kaj es kaj
    li zus tuaj peb tag kis huv,  ces kuv
    niam kuv txiv hmoob poj yawm tom ub li rov coj tau kuv niam kuv txiv nyab neej
    nus nej me ntxhais nkauj mog mim tuaj nrog nej ntsuas dej kus ntsuas txhuv,
    nes,

    Hnov tis yuas kuv niam kuv txiv nyab neej nus niam
    nkauj teej cuab txiv nraug tsav yig nkawm fwb cw, nes,
    avatar
    zaj tsho
    Guest


    zaj tshoob  Empty zaj ntuas ntxhais

    Post by zaj tsho May 30th 2011, 8:09 pm

    ( 2 ) - Zaj nov yog zaj, zaj tshoob ntuas ntxhais


    Zaj no yog hais thaum lub
    sij hawm uas ntuas tus ntxhais thiab tus vauv es yuav tsa qhua sawv kev mus
    tsev, nws yog txhua tus ua raug rau nco xws li nus tij los yog nus npaws, los
    yog txiv cob txheeb thiab dab laug cob txheeb muaj feem cuam los hais zaj no
    ntuas tus ntxhais ua neej,



    1,
    Hais zoov li kus, zoov li, ntxhiav nkauj mim nes ntxhiav nkauj mim koj ua koj
    niam koj txiv nkauj qas yeev nyob koj puas paub tias koj noj tas koj niam koj
    txiv qoob tuaj pes tsawg txhab, koj li hlob li ywm los paub tab, hnav tau koj
    niam koj txiv cev tsoos paj ntaub tuaj nyob quas   hlab,
    koj ces zoo zoo nkauj tam ntua nkauj sua los lawm nkauj mab, nqes hav tsis muaj
    tus nrog kav, ces txuj ci nyob tuaj mus nthuav dav, nes ntxhiav nkauj mim,


    1,
    Hais zoov li kus, zoov li, ntxhiav nkauj mim nes ntxhiav nkauj mim koj ua koj
    niam koj txiv nkauj qas yeev nyob koj puas paub tias koj noj tas koj niam koj
    txiv qoob tuaj pes tsawg tsev, koj li hlob li ywm los puv cev, hnav tau koj
    niam koj txiv cev tsoos paj ntaub tuaj phim quas   sev,
    koj ces zoo zoo nkauj tam ntua nkauj sua los lawm nkauj cev, tawm rooj li  plaws tuaj mus taug kev, tsis muaj tus nyob
    nrog tshev, ces tus txuj ci nthuav tawg paj li zees nyob mus ua rev,  nes, ntxhiav nkauj mim,


    2,
    Hais zoov li kus, zoov li, txhia niaj kus txhia xyoo ntxhiav nkauj mim koj niam
    koj txiv tsuas tsis pwv tshoob, koj niam koj txiv tus me plaj kos ntsig tshoob
    khuam li nkaus rau zoov pem laj tus ntsis xyoob, ntxhiav nkauj mim koj ua nkauj
    nyob ces tawm rooj li  plaws ces hnav tau
    koj niam koj txiv cev tsoos paj ntaub Hmoob, sawv li tsees tuaj mus leg koj
    niam koj txiv lub mus lawm luaj  qoob,
    ncig li yeev tuaj rau nram roob, nes, ntxhiav nkauj mim,


    2,
    Hais zoov li kus, zoov li, txhia niaj kus txhia xyoo ntxhiav nkauj mim koj niam
    koj txiv tsuas tsis pwv kos, koj niam koj txiv tus me plaj tshoob ntsig kos
    khuam li nkaus rau zoov pem laj tus ntsis nto, ntxhiav nkauj mim koj ua nkauj
    nyob ces tawm rooj li  plaws ces hnav tau
    koj niam koj txiv cev tsoos paj ntaub nyob phim laug mos, sawv li tsees tuaj
    mus leg koj niam koj txiv lub mus lawm luaj nrog,  ncig li yeev tuaj rau nram tog, nes, ntxhiav
    nkauj mim,


    3,
    Hais zoov li kus, zoov li, xyoo no ntxhiav nkauj mim koj hlob li yuj los paub
    tab, ces koj niam koj txiv tus plaj tshoob ntsig kos yuj lias los txog rau lawm
    koj niam koj txiv lub nrab mus plab xab, nkawm txiv tuam mej koob lwm mej zeeg
    kos muab tus plab tshoob los ntos ntseg kev kos los ntos tshab, qhua tshoob noj
    los tsau cev, qhua kos haus los tsau plab, tav ncaij sis nrus nkawm laj mej
    zeeg yuav sawv kab, nes ntxhiav nkauj mim koj nyob los koj noj tsis tau koj
    niam koj txiv tuaj diav hno hlab, koj tsis yog koj niam koj txiv ib leej mus
    tub cag ces twb tuav tsis tau koj niam koj txiv tus me ncej dab, koj yuav tau
    tshais roj li nruam hla li  plaws koj
    niam koj txiv lub qhov rooj tag nyob tuaj plaub mus xwm fab, mus ciaj tau lawm
    luag nyab, koj li muaj lawm lub neej nrog luag tab, nes ntxhiav nkauj mim,


    3,
    Hais zoov li kus, zoov li, xyoo no ntxhiav nkauj mim koj hlob li yuj los puv
    cev, ces koj niam koj txiv tus plaj tshoob ntsig kos yuj lias los txog rau lawm
    koj niam koj txiv lub nrab mus plab tsev, nkawm txiv tuam mej koob lwm mej zeeg
    kos muab tus plab tshoob los ntos tshab kev kos los ntos ntseg, qhua tshoob noj
    los tsau plab, qhua kos haus los tsau cev, tav ncaij sis nrus nkawm laj mej
    zeeg yuav sawv kev, nes ntxhiav nkauj mim koj nyob los koj noj tsis tau koj
    niam koj txiv tuaj diav hno ntse, koj tsis yog koj niam koj txiv ib leej mus
    tub cag ces twb tuav tsis tau koj niam koj txiv tus me lawm ncej tsev, koj yuav
    tau tshais roj li nruam hla li  plaws koj
    niam koj txiv lub qhov rooj tag nyob tuaj plaub mus xwm ces, mus ciaj tau lawm
    luag sev, koj li muaj lawm lub neej nrog luag leg, nes ntxhiav nkauj mim,


    4,
    Hais zoov li kus, zoov li, ntxhiav nkauj mim nes ntxhiav nkauj mim, txoj kev ua
    nyab ces yog txoj kev uas koj yuav tau tshais roj li nruam hla li  plaws koj niam koj txiv lub taw rooj, ces koj
    ntsia tim toj ub ces koj pom ib txoj kev si toj zim nyob tuaj mus nqe hav, nes
    koj puas paub tias txoj kev ntawd yog txoj kev mus dab tsi nes?, txoj kev ntawd
    ces yog txoj kev mus ua lawm luag nyab, nes sau siab zuj zog mus leg luag lub
    luaj qoob luaj loo nyob mus nto hav, ces li tau nrog luag noj kus luag hnav,
    nes qhib rooj lug tos kwv tos tij tuaj vam lub dag coj lawm lub zog pab, luag
    thiaj qhuas tias koj yog luag ib tug mus zoo nyab, nes ntxhiav nkauj mim,


    4, Hais zoov li kus, zoov li, ntxhiav nkauj mim
    nes ntxhiav nkauj mim, txoj kev ua nyab ces yog txoj kev uas koj yuav tau
    tshais roj li nruam hla li  plaws koj
    niam koj txiv lub taw rooj, ces koj ntsia tim toj ub ces koj pom ib txoj kev si
    toj zim nyob tuaj mus nce toj, nes koj puas paub tias txoj kev ntawd yog txoj
    kev mus dab tsi nes?, txoj kev ntawd ces yog txoj kev mus ua lawm luag poj, nes
    sau siab zuj zog mus leg luag lub luaj qoob luaj loo nyob mus nto toj, ces li tau
    nrog luag hnav kus luag noj, nes qhib rooj lug tos kwv tos tij tuaj vam lub dag
    coj lawm lub zog khom, ces luag thiaj qhuas tias koj yog luag ib tug mus zoo
    poj, nes ntxhiav nkauj mim,


    5, Hais zoov li kus, zoov li, ntxhiav nkauj mim
    nes ntxhiav nkauj mim txoj kev ua nyab tsis yog txoj kev mus ua qhua, nes koj
    mus tshwm tas tej mus sib ntua, tsis txhob mus dhia daj los dhia luag, nes nco
    li ntsoov mus  khaws li nkaus leej tub
    roog lub teej qav tsav num tuaj mus sib tw ua, mus ntxuaj luag vab tsoov luag
    xua, teev luag dab tiam lawm luag qhua, koj mus nrhiav tau tais zaub qab los
    nco li ntsoov mus nrhiav kom tau tais me zaub tsuag, nes  tsis pub leej me tub roog hnav daim khaub
    hlab ntxuag daim ntuag, nes luag thiaj qhuas tias koj yog luag ib leej me zoo nyab
    nquag, nes ntxhiav nkauj mim,


    5, Hais zoov li kus, zoov li, ntxhiav nkauj mim
    nes ntxhiav nkauj mim txoj kev ua nyab tsis yog txoj kev mus kav laj, nes koj
    mus tshwm tas tej mus sib tab, tsis txhob mus dhia luag los dhia daj, nes nco
    li ntsoov mus  khaws li nkaus leej tub
    roog lub teej qav tsav num tuaj mus sib tw tab, mus ntxuaj luag xua tsoov luag vab,
    tiam lawm luag qhua teev luag dab, koj mus nrhiav tau tais mus zaub tsuag los
    nco li ntsoov mus nrhiav kom tau tais me zaub qab, nes  tsis pub leej me tub roog hnav daim ntuag
    ntxuag daim khaub hlab, nes luag thiaj qhuas tias koj yog luag ib leej me zoo nyab,
    nes ntxhiav nkauj mim,


    6, Hais zoov li kus, zoov li, ntxhiav nkauj mim
    nes ntxhiav nkauj mim, txoj kev mus ua lawm luag nyab ces tsis yog txoj kev mus
    ua si os, txoj kev mus ua lawm luag nyab ces yog txoj kev mus ua neej yaj los
    kib txoob ib nqaj kom nto ntuj, ib nploog kom nto ntsis nes, nco li ntsoov mus muab
    txoj kev sib hlub saib kom tsim nqi, mus sib hlub ib txhiab kom txog lawm ib
    txhis nes, li muaj lawm lub neej nrog luag nyob mus kaj lawm li nrig,  tam ntua niam nkauj hnub txiv nraug hli tus
    duab ci, nes ntxhiav nkauj mim,


    6, Hais zoov li kus, zoov li, ntxhiav nkauj mim
    nes ntxhiav nkauj mim, txoj kev mus ua lawm luag nyab ces tsis yog txoj kev mus
    ua yaj yaum li yeev yuj os, txoj kev mus ua lawm luag nyab ces yog txoj kev mus
    ua neej yaj los kib txoob ib nploog kom mus nto ntsis ib nqaj kom nto ntuj nes,
    nco li ntsoov mus muab txoj kev sib hlub saib kom tsim nuj, mus sib hlub ib
    txhiab kom txog ib txhis tsis paub nrog luag tsum nes, li muaj lawm lub neej
    nyob mus kaj li lug, tam ntua niam nkauj hnub txiv nraug hli tus duab tshav
    ntuj, nes, ntxhiav nkauj mim,


    Hnov tis yuas ntxhiav nkauj mim niam nkauj teej
    cuab txiv nraug tsav yig nkawm fwb cw, nes,
    avatar
    zaj tsho
    Guest


    zaj tshoob  Empty yog tus hauv tsev zaj

    Post by zaj tsho May 30th 2011, 8:11 pm

    ( 3 ) - Zaj tshoob yog tus nyob hauv
    tsev zaj



     


    Txiv tuam mej zeeg tshwm, yog ob tug
    nyob hauv tsev zaj uas thaum mej koob lawv mus ua tshoob ua kos los txog ntawm
    qhov rooj es yog tus nyob hauv tsev mas yus muab ib lub rooj coj los tav ntawm
    qhov rooj thiab yus ce plaub phaj , nyob rau hauv ib lub phaj ntawd muaj ob lus
    khob, ob phaj mas yog cawv, hos ob phaj mas yog dej xwb ces yus tos lawv ntawm
    qhov rooj ces thaum lawv los txog rau ntawm qhov rooj ces, yus yuav tsum hais
    ib zaj yog zaj tshoob xws li nram no,



     


    1,
    Hais zoov li kus, zoov li, txhia niaj kus txhia xyoo kuv niam kuv txiv Hmoob
    poj yawm nws tsis pwv tshoob, nws tus plaj kos ntsig tshoob yuj lias los  tsis tau txum, kuv niam kuv txiv Hmoob poj
    yawm tsuas pom suav txawj txeeg sawv ua luam nyuj, yuj plaws rau niam mab niag
    suav ntuj, tav tau yeej mis ceeb mis, yeej ntxws ceeb ntxws lawm tas tej sib
    lig yuj, nes,


     


    1,
    Hais zoov li kus, zoov li, txhia niaj kus txhia xyoo kuv niam kuv txiv Hmoob
    poj yawm nws tsis pwv kos, nws tus plaj tshoob ntsig kos yuj lias los  tsis tau cuag, kuv niam kuv txiv Hmoob poj
    yawm tsuas pom suav txawj txeeg sawv ua luam npua, yuj plaws rau niam mab niag
    suav luag, tav tau yeej mis ceeb mis, yeej ntxws ceeb ntxws lawm tas tej sib
    lig zuag, nes,


     


    2,
    Hais zoov lis, zoov li, xyoo no kuv niam kuv txiv Hmoob poj yawm nws yuav pwv
    tshoob, nws tus plaj kos ntsig tshoob yuj lias pem liaj lwg rhwv mwg rais los
    thoob, kuv niam kuv txiv Hmoob poj yawm nws li nrauj qoob tseg loo nrauj qav
    tseg num li zus tuaj rau nram roob, ntoj li nuag rais los poob, nws li los npaj
    nqaij npaj hno puv li npo npaj dej npaj cawv puv li ntoob, los pib tau nws lub
    rooj kos los lawm rooj tshoob, nes,


     


    2,
    Hais zoov lis, zoov li, xyoo no kuv niam kuv txiv Hmoob poj yawm nws yuav pwv
    kos, nws tus plaj tshoob ntsig kos yuj lias pem liaj lwg rhwv mwg rais los nto,
    kuv niam kuv txiv Hmoob poj yawm nws li nrauj qoob tseg loo nrauj qav tseg num
    li zus tuaj rau nram tog, ntoj li nuag rais los txog, nws li los npaj dej  npaj cawv puv li ntoob npaj nqaij npaj hno
    puv li npo, los pib tau nws lub rooj tshoob los lawm rooj kos, nes,


     


    3,
    Hais zoov li kus, zoov li, hmo no kuv niam kuv txiv Hmoob poj yawm tus plaj
    tshoob ntsig kos yuj lias los txog rau kuv niam kuv txiv Hmoob poj yawm lub
    qhov mus rooj tag nyob tuaj plaub mus xwm fab, ces pas liaj pas iav puv sis
    yees los txij nthab, rooj zag rooj zuag tav sis yees los tav tau laj tub sis
    yau neb txoj mus hauv kab, los yog kuv niam kuv txiv Hmoob poj yawm tseem ua
    tshoob ua kos tos tub los tos nyab, nes,


     


    3,
    Hais zoov li kus, zoov li, hmo no kuv niam kuv txiv Hmoob poj yawm tus plaj
    tshoob ntsig kos yuj lias los txog rau kuv niam kuv txiv Hmoob poj yawm lub
    qhov mus rooj tag nyob tuaj plaub mus xwm ces, ces pas liaj pas iav puv sis
    yees los txij tsev, rooj zag rooj zuag tav sis yees los tav tau laj tub sis yau
    neb txoj mus hauv kev, los yog kuv niam kuv txiv Hmoob poj yawm tseem ua tshoob
    ua kos tos tub los tos sev, nes,


     


     


    4,
    Hais zoov li kus, zoov li, laj tub sis yau neb yog liaj lwg rhwv mwg tus txiv
    tuam mej koob lwm mej zeeg kos, ntoj kab tshoob mus thoob taug kev kos mus nto,
    neb tau li nraim liaj lwg rhwv mwg txoj me qub kab, mus txog rau ntuj sua teb
    puag tom qab, poob li nthav rau kuv niam kuv txiv nyab neej nus lub nrab mus
    plaj xab, kuv niam kuv txiv nyab neej nus muaj qas tsi tsaws li zus rau neb tej
    mus quav npab, neb ho rais loj lees rov fib qab, yog neb coj tau me nkauj nyab
    nraug vauv los yuav vam tau neb coj los cob li nkaus rau kuv niam kuv txiv
    Hmoob poj yawm tus me ncej dab, yog neb coj tau 
    tus me yeej mis ceeb mis yeej ntxws ceeb ntxws los yuav vam tau neb coj
    los cob li nkaus rau kuv niam kuv txiv Hmoob poj yawm tej me quav npab, nes,


     


    4,
    Hais zoov li kus, zoov li, laj tub sis yau neb yog liaj lwg rhwv mwg tus txiv
    tuam mej koob lwm mej zeeg kos, ntoj kab tshoob mus thoob taug kev kos mus nto,
    neb tau li nraim liaj lwg rhwv mwg txoj me qub kev, mus txog rau ntuj sua teb
    puag tom peg, poob li nthav rau kuv niam kuv txiv nyab neej nus lub nrab mus
    plaj tsev, kuv niam kuv txiv nyab neej nus muaj qas tsi tsaws li zus rau neb
    tej mus quav tes, neb ho rais loj lees rov fib kev, yog neb coj tau me nkauj
    nyab nraug vauv los yuav vam tau neb coj los cob li nkaus rau kuv niam kuv txiv
    Hmoob poj yawm tus me ncej tsev, yog neb coj tau  tus me yeej mis ceeb mis yeej ntxws ceeb
    ntxws los yuav vam tau neb coj los cob li nkaus rau kuv niam kuv txiv Hmoob poj
    yawm tej me quav tes, nes,


     


    Hnov
    tis yuas liaj lwg rhwv mwg tus txiv tuam mej koob lwm mej zeeg kos, nkawm fwb
    cw, nes,
    avatar
    zaj tsho
    Guest


    zaj tshoob  Empty yog tus hauv tsev zaj

    Post by zaj tsho May 30th 2011, 8:14 pm

    ( 4 ) - Zaj tshoob yog tus nyob hauv
    tsev zaj



     


    Zaj no yog zaj yus hais thov kom ob tug
    mej koob muab plig ntawm lub rooj thiab cob pob nyiaj phij cuam thiab lub kaus
    rau tub nyab uas thaum mej koob los plov meej lus  tas es kom mej koob pab cob rau tub nyab,



     


    1,
    Hais zoov li kus, zoov li, txhia niaj kus txhia xyoo kuv niam kuv txiv Hmoob
    poj yawm tsuas tsis pwv tshoob, nws tus plaj kos ntsig tshoob, khuam li nkaus
    rau zoov pem laj tus ntsis xyoob, kuv niam kuv txiv Hmoob poj yawm tsuas pom
    tau suav txawj txeeg sawv tuaj ua luam qoob, ncig li yeev tuaj rau nram roob,
    nes,


     


    1,
    Hais zoov li kus, zoov li, txhia niaj kus txhia xyoo kuv niam kuv txiv Hmoob
    poj yawm tsuas tsis pwv kos, nws tus plaj tshoob ntsig kos, khuam li nkaus rau
    zoov pem laj tus ntsis nto, kuv niam kuv txiv Hmoob poj yawm tsuas pom tau suav
    txawj txeeg sawv tuaj ua luam mog, ncig li yeev tuaj rau nram tog, nes,


     


    2,
    Hais zoov lis, zoov li, xyoo no kuv niam kuv txiv Hmoob poj yawm nws yuav pwv
    tshoob, nws tus plaj kos ntsig tshoob yuj lias pem liaj lwg rhwv mwg rais los
    thoob, kuv niam kuv txiv Hmoob poj yawm nws li nrauj qoob tseg loo nrauj qav
    tseg num li zus tuaj rau nram roob, ntoj li nuag rais los poob, nws li los npaj
    nqaij npaj hno puv li npo npaj dej npaj cawv puv li ntoob, los pib tau nws lub
    rooj kos los lawm rooj tshoob, nes,


     


    2,
    Hais zoov lis, zoov li, xyoo no kuv niam kuv txiv Hmoob poj yawm nws yuav pwv
    kos, nws tus plaj tshoob ntsig kos yuj lias pem liaj lwg rhwv mwg rais los nto,
    kuv niam kuv txiv Hmoob poj yawm nws li nrauj qoob tseg loo nrauj qav tseg num
    li zus tuaj rau nram tog, ntoj li nuag rais los txog, nws li los npaj dej  npaj cawv puv li ntoob npaj nqaij npaj hno
    puv li npo, los pib tau nws lub rooj tshoob los lawm rooj kos, nes,


     


    3,
    Hais zoov li kus, zoov li, hmo no kuv niam kuv txiv Hmoob poj yawm tus plaj
    tshoob ntsig kos yuj lias los txog rau kuv niam kuv txiv Hmoob poj yawm lub qab
    mus plaj xab, los yog kuv niam kuv txiv Hmoob poj yawm tseem ua tshoob ua kos
    tos tub los tos nyab, laj tub sis yau neb yog liaj lwg rhwv mwg tus txiv tuam mej
    koob lwm mej zeeg kos, neb ntoj li nraws liaj lwg rhwv mwg txog nyuag qub kab,
    mus txog rau ntuj sua teb tom qab, mus poob li nthav rau kuv niam kuv txiv nyab
    neej nus lub nrab mus plaj xab, kuv niam kuv txiv nyab neej nus muaj qas tsi
    tsaws li zus rau neb tej me quav npab, neb ho rais loj lees rov fib qab, yog
    neb coj tau me nkauj nyab nraug vauv los, los yuav vam tau neb coj los cob li
    nkaus rau kuv niam kuv txiv Hmoob poj yawm tus me ncej dab, yog neb coj tau lus
    tshoob lus kos los yuav vam tau neb coj los nthuav tshab, yog neb coj tau me
    yeej mis ceeb mis yeej ntxws ceeb ntxws los yuav vam tau neb coj los cob li
    nkaus rau kuv niam kuv txiv Hmoob poj yawm tej me quav npab, kuv niam kuv txiv
    Hmoob poj yawm zoo coj nws me yeej mis ceeb mis yeej ntxws ceeb ntxws coj mus
    cia nyob mus zoo hnab, cuaj hnub tsis tseev rag kev yim niaj tsis tseev rag
    kab, nes,


     


     


     


    3,
    Hais zoov li kus, zoov li, hmo no kuv niam kuv txiv Hmoob poj yawm tus plaj
    tshoob ntsig kos yuj lias los txog rau kuv niam kuv txiv Hmoob poj yawm lub qab
    mus plaj tsev, los yog kuv niam kuv txiv Hmoob poj yawm tseem ua tshoob ua kos
    tos tub los tos sev, laj tub sis yau neb yog liaj lwg rhwv mwg tus txiv tuam
    mej koob lwm mej zeeg kos, neb ntoj li nraws liaj lwg rhwv mwg txog nyuag qub
    kev, mus txog rau ntuj sua teb tom peg, mus poob li nthav rau kuv niam kuv txiv
    nyab neej nus lub nrab mus plaj tsev, kuv niam kuv txiv nyab neej nus muaj qas
    tsi tsaws li zus rau neb tej me quav tes, neb ho rais loj lees rov fib kev, yog
    neb coj tau me nkauj nyab nraug vauv los, los yuav vam tau neb coj los cob li
    nkaus rau kuv niam kuv txiv Hmoob poj yawm tus me ncej tsev, yog neb coj tau
    lus tshoob lus kos los yuav vam tau neb coj los nthuav tseb, yog neb coj tau me
    yeej mis ceeb mis yeej ntxws ceeb ntxws los yuav vam tau neb coj los cob li
    nkaus rau kuv niam kuv txiv Hmoob poj yawm tej me quav tes, kuv niam kuv txiv
    Hmoob poj yawm zoo coj nws me yeej mis ceeb mis yeej ntxws ceeb ntxws coj mus
    cia nyob mus zoo tsev, cuaj hnub tsis tseev rag kab yim niaj tsis tseev rag
    kev, nes,


     


     


    Hnov
    tis yuas liaj lwg rhwv mwg tus txiv tuam mej koob lwm mej zeeg kos, nkawm fwb
    cw, nes,
    avatar
    zaj tsho
    Guest


    zaj tshoob  Empty yog mej koob zaj uas saj yeeb saj tshuaj

    Post by zaj tsho June 4th 2011, 6:57 pm

    (
    5 ) - Yog mej koob zaj uas saj yeeb saj tshuaj



     


    Zaj tshoob no yog zaj saj yeeb saj
    tshuaj ntawm qhov rooj uas thaum mej koob mus ua tshoob los txog rau ntawm niam
    txiv poj yawm qhov rooj, es niam txiv muaj yeeb tshuaj tos mej koob.



     


    1,
    Hais zoov lis kus, zoov li, Kuv niam, kuv txiv Hmoob poj yawm ces nws txus
    txoos, kus txus muaj koob, ces nws tooj zog tuaj rau lawm nruab roob, lauj zog
    kav yiag lim qaim xws kav txoob, yuav lwg li zog nplooj mos li nyoos xws lawm nplooj
    xyoob, ces yog lawm hauv tshuaj kab yeeb Hmoob, nes,


     


    1,
    Hais zoov lis kus, zoov li, Kuv niam, kuv txiv Hmoob poj yawm ces nws txus
    txoos, kus txus muaj tseeb, ces nws tooj zog tuaj rau lawm nruab xeeb, lauj zog
    kav yiag lim qaim xws kav nqeeb, yuav lwg li zog nplooj mos li nyoos xws lawm nplooj
    rheeb, ces yog lawm Hmoob hauv tshuaj kab yeeb, nes,


     


    2,
    Hais zoov lis kus, zoov li, Kuv niam, kuv txiv Hmoob poj yawm, nws sau li zus
    los lawm tsheej phab, muab ntim li zus tuaj rau lawm nruab hnab, qas li zus
    tuaj rau ntawm npab, rais los lees rov fib qab, los poob li nthav rau kuv niam
    kuv txiv Hmoob poj yawm lub nrab mus plaj xab, ces hliv li zus tuaj rau lawm
    nruab vab, kauv li zus nplooj los xyaw kav, nes,


     


    2,
    Hais zoov lis kus, zoov li, Kuv niam, kuv txiv Hmoob poj yawm, nws sau li zus
    los lawm tsheej tes, muab ntim li zus tuaj rau lawm nruab hnab ntev, qas li zus
    tuaj rau ntawm cev, rais los lees rov fib kev, los poob li nthav rau kuv niam
    kuv txiv Hmoob poj yawm lub nrab mus plaj tsev, ces hliv li zus tuaj rau lawm
    nruab lev, kauv li zus nplooj los  xyaw
    ceg, nes,


     


    3,
    Hais zoov lis kus zoov li, kuv niam kuv txiv hmoob poj yawm, zuag li zog nplooj
    mus xyaw kav ntau, coj los txoov sis zus nyob mus tsheej hau, cej toog rauv
    taws rau, nyob sis zus saum lauj mus kaub npau, nws xiv li zus nyob mus  npau sis vau, nis,


     


    3,
    Hais zoov lis kus zoov li, kuv niam kuv txiv hmoob poj yawm, zuag li zog kav
    mus xyaw nplooj, coj los txoov sis zus nyob mus tsheej thooj, cej toog rauv
    taws nrooj, nyob sis zus saum lauj mus kaub ncooj, nws xiv li zus nyob mus npau
    sis voom, nes,


     


    4,
    Hais zoov lis kus zoov li, kuv niam kuv txiv Hmoob poj yawm, muaj qoov li zog
    nyob nrog lim, ces hliv lis zus tuaj rau nruab khob, daws lim zog tuaj rau
    nruab ntim, me phooj ywg kwv yiag kwv sis luag kuv niam kuv txiv hmoob poj yawm
    nkawm txiv tuam mej zeeg tshws, neb tus me cawv yeeb, cawv tshuaj ces cia rau
    neb nyob mus xub sim, nes.


     


    4,
    Hais zoov lis kus zoov li, kuv niam kuv txiv Hmoob poj yawm, muaj qoov li zog
    nyob nrog lam, ces hliv lis zus tuaj rau nruab khob, daws lim zog tuaj rau
    nruab phaj, me phooj ywg kwv yiag kwv sis luag kuv niam kuv txiv hmoob poj yawm
    nkawm txiv tuam mej zeeg tshws, neb tus me cawv yeeb, cawv tshuaj ces cia rau
    neb nyob mus xub saj, nes.


     


     


    5,
    Hais zoov lis kus, zoov li, Nyob ntsis tsam neb tus me cawv yeeb kus cawv
    tshuaj ces ntshe ib tsam ho yog tus cawv mov mus nplej tshiab, ces ho yog lawm
    tus cawv daw kus cawv iab, hliv li zus los muaj txo lawm li niab, ces ho yuav
    txoos li zog tuaj rau lawm txoj mus  hlab
    siab, nes,


     


    5,
    Hais zoov lis kus, zoov li, Nyob ntsis tsam neb tus me cawv yeeb kus cawv
    tshuaj ces ntshe ib tsam ho yog tus cawv mov mus nplej xyaw, ces ho yog lawm
    tus cawv iab kus caw daw, hliv li zus los muaj txo lawm li ntxaws, ces ho yuav
    txoos li zog tuaj rau lawm txoj mus  hlab
    plawv, nes,


     


    Hnov
    tim yuas, kuv niam kuv txiv hmoob poj yawm nkawm txiv tuam mej zeeg tshwm,
    nkawm fwb cw, nes.
    avatar
    zaj tsho
    Guest


    zaj tshoob  Empty zaj nov yog mej koob zaj thov ntsaig rooj ntshaig tog

    Post by zaj tsho June 4th 2011, 6:58 pm

    (
    6 ) - Zaj nov yog mej koob Zaj thov ntsaig rooj



     


    Zaj no yog zaj thov kom ob tug tub tos
    qhua ho pab ntsaig rooj ntawm qhov rooj uas thaum me koob mus ua tshoob los rau
    ntawm qhov rooj.



     


    1,
    Hais zoov lis kus, zoov li, Txhia niaj kus txhia xyoo, kuv niam kuv txiv Hmoob
    poj yawm tus plaj tshoob ntsig kos, yuj lias los  tsis tau txum, ces kuv niam kuv txiv Hmoob
    poj yawm tsuas pom tau suav txawj txeeg sawv tuaj ua luam nyuj, ces yuj plaws
    rau niaj mab niag suav ntuj, es tav tau yeej mis, ceeb mis, yeej ntxws, lawm
    tas tej mus sib lig yuj, nis,


     


    1,
    Hais zoov lis kus, zoov li, Txhia niaj kus txhia xyoo, kuv niam kuv txiv Hmoob
    poj yawm tus plaj tshoob ntsig kos, yuj lias los  tsis tau cuag, ces kuv niam kuv txiv Hmoob
    poj yawm tsuas pom tau suav txawj txeeg sawv tuaj ua luam npua, ces yuj plaws
    rau niaj mab niag suav luag, es tav tau yeej mis, ceeb mis, yeej ntxws lawm tas
    tej mus sib lig zuag, nis,


     


    2,
    Hais zoov lis kus zoov li, hmo no ces kuv niam kuv txiv Hmoob poj yawm tus plaj
    tshoob ntsig kos yuj lias los txog rau kuv niam kuv txiv Hmoob poj yawm lub qab
    mus plaj xab, ces kuv niam kuv txiv Hmoob poj yawm tsuas pom tau suav txawj
    txeeg sawv nce kab, kuv niam kuv txiv Hmoob poj yawm tus me yeej mis ceeb mis,
    yeej ntxws ceeb ntxws, ntws li lug los lawm niaj mus ib hnab, nraug li zees los
    lawm tsheej phab, yuav los fim tas kuv niam kuv txiv Hmoob poj yawm lub mus
    nruab hnab, nis,


     


    2,
    Hais zoov lis kus zoov li, hmo no ces kuv niam kuv txiv Hmoob poj yawm tus plaj
    tshoob ntsig kos yuj lias los txog rau kuv niam kuv txiv Hmoob poj yawm lub qab
    mus plaj tsev, ces kuv niam kuv txiv Hmoob poj yawm tsuas pom tau suav txawj
    txeeg sawv nce kev, kuv niam kuv txiv Hmoob poj yawm tus me yeej mis ceeb mis,
    yeej ntxws ceeb ntxws, ntws li lug los lawm niaj mus ib rev, nraug li zees los
    lawm tsheej kev, yuav los fim tas kuv niam kuv txiv Hmoob poj yawm lub mus
    nruab hnab ntev, nis,


     


    3,
    Hais zoov li kus, zoov li, laj tub sis yau wb ntauj nuag los txog kuv niam kuv
    txiv Hmoob poj yawmn lub qhov mus rooj tag, nyob tuaj lawm plaub xwm fab, ces
    pas liaj pas iav, puv sim yees los txij nthab, os rooj zag rooj zuag, tav sis
    yees los tav tau laj tub sis yau wb txoj mus hauv kab, los wb luj vim ua lawm
    neb tsaug, neb muab pas liaj pas iav laub li nthwv rau lawm zaj laug pas, neb
    muab rooj zag rooj zuag, ntsaig lis zus rau lawm qab mus plaj xab, laj tub sis
    yau wb zoo coj kuv niam kuv txiv Hmoob poj yawm me yeej mis ceeb mis yeej ntxws
    yeej ntxws los cob li nkaus rau kuv niam kuv txiv Hmoob poj yawm tus me ncej
    dab, nes,


     


    3,
    Hais zoov li kus, zoov li, laj tub sis yau wb ntauj nuag los txog kuv niam kuv
    txiv Hmoob poj yawmn lub qhov mus rooj tag, nyob tuaj lawm plaub xwm ces, ces
    pas liaj pas iav, puv sim yees los txij tsev, os rooj zag rooj zuag, tav sis
    yees los tav tau laj tub sis yau wb txoj mus hauv kev, los wb luj vim ua lawm
    neb tsaug, neb muab pas liaj pas iav laub li nthwv rau lawm zaj laug ces, neb
    muab rooj zag rooj zuag, ntsaig lis zus rau lawm qab mus plaj tsev, laj tub sis
    yau wb zoo coj kuv niam kuv txiv Hmoob poj yawm me yeej mis ceeb mis yeej ntxws
    yeej ntxws los cob li nkaus rau kuv niam kuv txiv Hmoob poj yawm tus me ncej
    tsev, nes,


     


    4,
    Hais zoov li kus, zoov li, kuv niam kuv txiv Hmoob poj yawm nkawm txiv tuam mej
    zeeg tshws neb tsis txhob ua lawm tshws zais nas rau lawm tej mus qab txag, kauv
    zais hneev li zus rau lawm nruab xub, laj tub sis yau wb luj vim ua lawm neb
    tsaug os, neb muab pas liaj pas iav laub li nthwv rau lawm zaj laug hub, muab
    rooj zaj rooj zuag ntsaig li zus rau lawm qab mus plaj cub, neb ho muaj lus
    tshoob lus kos los yuav vam tau lawm neb tab meeg qhub, muaj lawm suav nqaij
    los yuav vam tau lawm neb tab meeg ntxus, nes,


     


    4,
    Hais zoov li kus, zoov li, kuv niam kuv txiv Hmoob poj yawm nkawm txiv tuam mej
    zeeg tshws neb tsis txhob ua lawm tshws zais nas rau lawm tej mus qab txag,
    kauv zais hneev li zus rau lawm hav mus paj cais, laj tub sis yau wb luj vim ua
    lawm neb tsaug os, neb muab pas liaj pas iav laub li nthwv rau lawm zaj laug
    tais, muab rooj zaj rooj zuag ntsaig li zus rau lawm qab mus plaj cais, neb ho muaj
    lus tshoob lus kos los yuav vam tau lawm neb tab meeg hais, muaj lawm suav
    nqaij los yuav vam tau lawm neb tab meeg hlais, nes,


     


    Hnov
    tim yuas, kuv niam kuv txiv hmoob poj yawm nkawm txiv tuam mej zeeg tshwm,  nkawm fwb cw, nes.


     
    avatar
    zaj tsho
    Guest


    zaj tshoob  Empty zaj nov yog mej koob zaj muab plig ntawm qhov rooj los yog saum rooj

    Post by zaj tsho June 4th 2011, 7:00 pm

    ( 7 ) - Zaj nov yog mej koob zaj muab
    plig ntawm qhov rooj



     


    1,Hais
    zoov li kus, zoov li, Kuv niam kuv txiv Hmoob poj yawm nws ntshai li rwg ib
    tsam nkauj nyab nraug vauv, daim ntawv nyiaj keeb puaj txwm hlav tsis sib txig,
    nws li mus cog maj li zus tuaj rau nram i, maj hlav mos li nyoos xws lawm mus
    nplooj hli, nws tswm li zog daim tawv maj nti, nkoov li zog ua lawm txoj mus
    xov khi, qhaib li zus ua lawm lub kaus vej kaus vuas los kaus ci, muab rau laj
    tub sis yau wb coj mus roos nkauj nyab nraug vauv tus ntsuj plig, nis,


     


    1,Hais
    zoov li kus, zoov li, Kuv niam kuv txiv Hmoob poj yawm nws ntshai li rwg ib
    tsam nkauj nyab nraug vauv, daim ntawv nyiaj keeb puaj txwm hlav tsis sib luag,
    nws li mus cog maj li zus tuaj rau nram tsuag, maj hlav mos li nyoos xws lawm
    mus nplooj tshuab, nws tswm li zog daim tawv maj tuab, nkoov li zog ua lawm
    txoj mus hlua xuab, qhaib li zus ua lawm lub kaus vej kaus vuas los kaus
    ntsuab, muab rau laj tub sis yau wb coj mus roos nkauj nyab nraug vauv tus
    ntsuj duab, nis,


     


    2,
    Hais zoov li kus, zoov li, niam mab niag suav lub kaus vej vuam ces niam mab
    niag suav tsuas siv los roos  tas  ib cim tshav los lawm ntuj ntev, ncig li yeev
    lawm taug kev, kuv niam kuv txiv Hmoob poj yawm lub kaus vej vuam ces ntswj li
    zog los ntawm txooj mus xyoob cev, qhaib li zus ua lawm ob tshooj mus qhab
    tsev, plooj pliag lias daim ntaub mus maj ntev, plhis plho ua liaj lwg rhwv mwg
    lub kaus vej vuam roos tub los roos sev, cob li nkaus rau laj tub sis yau wb
    tej mus quav tes, wb li  tau kuv niam kuv
    txiv Hmoob poj yawm lub kaus vej kaus vuam roos nkauj nyab nraug vauv qwv qhua
    tshoob qhua kos lis zees nyob mus ntoj kev, thaiv dab txeej dab qus tsis pom
    nkauj nyab nraug vauv txoj mus  hau kev,
    nes,


     


     2, Hais zoov li kus, zoov li, niam mab niag
    suav lub kaus vej vuam ces niam mab niag suav tsuas siv los roos  tas ib cim tshav los lawm ntuj nag, ncig li
    yeev rau lawm nruab kab, kuv niam kuv txiv Hmoob poj yawm lub kaus vej vuam ces
    ntswj li zog los ntawm txooj mus xyoob hmab, qhaib li zus ua lawm ob mus tshooj
    qhab, plooj pliag lias daim ntaub maj, plhis plho ua liaj lwg rhwv mwg lub kaus
    vej vuam roos tub los roos nyab, cob li nkaus rau laj tub sis yau wb tej mus
    quav npab, wb li tau kuv niam kuv txiv Hmoob poj yawm lub kaus vej kaus vuam
    roos nkauj nyab nraug vauv qwv qhua tshoob qhua kos lis zees nyob mus ntoj kab,
    thaiv dab txeej dab qus tsis pom nkauj nyab nraug vauv txoj mus  hau kab, nes,


     


    3,
    Hais zoov li kus, zoo li, laj tub sis yau wb ntauj nuag mus txog li ntua rau
    lawm kuv niam kuv txiv Hmoob nyab neej nus lub tsev vaj lig txawm tuaj rau nram
    taug, vov tau plaub tshooj mus vuas nraug, qab plaj tsev ci li oo xws dej nyiag
    dej kub nyob tsis xau, qhab tsev yiag li qaim zoo rau laj tub sis yau wb tuaj
    nyob khuam kaus, wb zoo muab kuv niam kuv txiv Hmoob poj yawm tus plaj tshoob
    ntsig kos tuaj nyob mus ntos dhau, nes


     


    3,
    Hais zoov li kus, zoo li, laj tub sis yau wb ntauj nuag mus txog li ntua rau
    lawm kuv niam kuv txiv Hmoob nyab neej nus lub tsev vaj lig txawm tuaj rau nram
    tog, vov tau plaub tshooj mus vuas txho, qab plaj tsev ci li oo xws dej nyiag
    dej kub nyob tsis nplo, qhab tsev yiag li qaim zoo rau laj tub sis yau wb tuaj
    nyob khuam kaus so, wb zoo muab kuv niam kuv txiv Hmoob poj yawm tus plaj
    tshoob ntsig kos tuaj nyob mus ntos dhau, nes


     


    4,
    Hais zoov li kus, zoov li, nag hmo ces tsaus ntuj nes, kaj ntug tag kis kaj
    tuaj to qhov nthab, tus plaj tshoob wb ntos ntseg, kev kos wb ntos tshab, wb
    noj los tsau cev, haus los tsau plab, ces wb taij li ntsees ob nkawm phooj ywg
    kwv yaig kwv sis luag yeej cuam lis zus wb niam nkauj kaus rau wb tej mus quav
    npab, wb li  tau wb niam nkauj kaus roos
    nkauj nyab nraug vauv qwv qhua tshoob qhua kos rais li lees rov fib qab, thaiv
    tau dab txeej dab qus tsis pom nkauj nyab nraug vauv txoj me qub kab, nes,


     


    4,
    Hais zoov li kus, zoov li, nag hmo ces tsaus ntuj nes, kaj ntug tag kis kaj
    tuaj to qhov tsev, tus plaj tshoob wb ntos tshab, kev kos wb ntos ntseg, wb noj
    los tsau plab, haus los tsau cev, ces wb taij li ntsees ob nkawm phooj ywg kwv
    yaig kwv sis luag yeej cuam lis zus wb niam nkauj kaus rau wb tej mus quav tes,
    wb li  tau wb niam nkauj kaus roos nkauj
    nyab nraug vauv qwv qhua tshoob qhua kos rais li lees rov fib kev, thaiv tau
    dab txeej dab qus tsis pom nkauj nyab nraug vauv txoj me qub kev, nes,


     


    5,
    Hais zoov li kus, zoov li, laj tub sis yau wb ntoj nuag los txog nrad ub,  ces wb tsis pom tau tsav tsim nuj tus dab
    tsi?, wb tsuas pom tau poj mab sawv qhib liaj, yawm suav sawv qhib hub, wb tus
    hauv kaus ces roov rawv nkauj nyab nraug vauv los lawm li ntxhub, tsis tseev
    tshav mus ntuj kub, hos wb tus me qab kaus ces tuav rawv poj mab yawm suav tus
    me plig kub, zaum no ces tseev los txaus tau me nkauj nyab nraug vauv noj quas
    lub niaj haus kav lawm lub hnub, nes,


     


    5,
    Hais zoov li kus, zoov li, laj tub sis yau wb ntoj nuag los txog nrad tiaj,  ces wb tsis pom tau tsav tsim nuj tus dab
    tsi?, wb tsuas pom tau poj mab sawv qhib hub, yawm suav sawv qhib liaj, wb tus
    hauv kaus ces roov rawv nkauj nyab nraug vauv los lawm li ntxiaj, tsis tseev
    tshav mus ntuj ziab, hos wb tus me qab kaus ces tuav rawv poj mab yawm suav tus
    me plig nyiaj, zaum no ces tseev los txaus tau me nkauj nyab nraug vauv noj
    quas lub hnub haus kav lawm lub niaj, nes,


     


    6,
    Hais zoov li kus, zoov li, laj tub sis yau wb ntoj nuag los txog qhov chaw nyob
    mus noj su,  ces wb noj lawm niaj mus ib
    diav, huab lawm niaj mus ib diav, muaj lawm ib diav poob li nthav tuaj rau tid
    toj, ces kuv niam kuv txiv Hmoob poj yawm, peb tis mus txwv koob kus txwv poj
    nyob mus  khaws tau noj, ces nrog wb tav
    tus yeej mis ceeb mis, yeej ntxws ceeb ntxws sawv li  tsees los lawm ua npoj, nes,


     


    6,
    Hais zoov li kus, zoov li, laj tub sis yau wb ntoj nuag los txog qhov chaw nyob
    mus noj su,  ces wb noj lawm niaj mus ib
    diav, huab lawm niaj mus ib diav, muaj lawm ib diav poob li nthav tuaj rau tid
    dawm, ces kuv niam kuv txiv Hmoob poj yawm, peb tis mus txwv koob kus txwv yawm
    nyob mus tau khaws, ces nrog wb tav tus yeej mis ceeb mis, yeej ntxws ceeb
    ntxws sawv li tsees los lawm ua nkawm, nes,


     


    7,
    Hais zoov li kus, zoov li, laj tub sis yau wb ntoj nuag los txog rau lawm kuv
    niam kuv txiv Hmoob poj yawm lub qab vaj mus tsib taug vov lawm nplooj tsawb,
    wb niam nkauj kaus puav tau yeej mis ceeb mis yeej ntxws ceeb ntxws los lawm li
    daws, los kaw li nkaus rau kuv niam kuv txiv Hmoob poj yawm lub mus nkuaj
    txawb, cuaj hnub tsis tseev rag tshwm mog yim niaj tsis tseev rag tawm, nis,


     


    7,
    Hais zoov li kus, zoov li, laj tub sis yau wb ntoj nuag los txog rau lawm kuv
    niam kuv txiv Hmoob poj yawm lub qab vaj mus tsib taug vov lawm nplooj kws, wb
    niam nkauj kaus puav tau yeej mis ceeb mis yeej ntxws ceeb ntxws los lawm li
    ntws, los kaw li nkaus rau kuv niam kuv txiv Hmoob poj yawm lub mus nkuaj txws,
    cuaj hnub tsis tseev rag tawm mog yim niaj tsis tseev rag tshwm, nis,


     


    8,
    Hais zoov li kus, zoov li, laj tub sis yau wb ntoj nuag los txog rau lawm kuv
    niam kuv txiv Hmoob poj yawm lub qhov mus rooj tag plaub mus xwm fab, laj tub
    sis yau wb tsis pom qab cob ces wb muab cob li nkaus rau kuv niam kuv txiv
    Hmoob poj yawm nkawm tub tos qhua neb tej me quav npab, ces neb coj mus cog ceg
    nyob mus ciaj cag, kom nplooj hlav mos li nyoos nyob mus txij nthab, yog tawg
    paj txi txiv ces cia tuav me nkauj nyab nraug vauv tus ncej dab, yog tawg paj
    tsis txi txiv ces kom nkauj nyab nraug vauv tshaj xib rau xov li nraws rau kuv
    niam kuv txiv nyab neej nus nyob ntuj sua teb tom qab, ho txoj li nraws liaj
    lwg rhwv mwg txoj me qub kab, ces tus plaj tshoob ntsig kos ntxhee li sua los
    rau kuv niam kuv txiv Hmoob poj yawm lub qab mus plaj xab, ces zaum no kuv niam
    kuv txiv Hmoob poj yawm tus txiv nyuj quas pwm yeej yuav nqov li qaws rais li
    lees rov fib qab, nes,


     


    8,
    Hais zoov li kus, zoov li, laj tub sis yau wb ntoj nuag los txog rau lawm kuv
    niam kuv txiv Hmoob poj yawm lub qhov mus rooj tag plaub mus xwm ces, laj tub
    sis yau wb tsis pom qab cob ces wb muab cob li nkaus rau kuv niam kuv txiv
    Hmoob poj yawm nkawm tub tos qhua neb tej me quav tes, ces neb coj mus cog cag
    nyob mus ciaj ceg, kom nplooj hlav mos li nyoos nyob mus txij tsev, yog tawg
    paj txi txiv ces cia tuav me nkauj nyab nraug vauv tus ncej tsev, yog tawg paj
    tsis txi txiv ces kom nkauj nyab nraug vauv tshaj xib rau xov li nraws rau kuv
    niam kuv txiv nyab neej nus nyob ntuj sua teb tom peg, ho txoj li nraws liaj
    lwg rhwv mwg txoj me qub kev, ces tus plaj tshoob ntsig kos ntxhee li sua los
    rau kuv niam kuv txiv Hmoob poj yawm lub qab mus plaj tsev, ces zaum no kuv
    niam kuv txiv Hmoob poj yawm tus txiv nyuj quas pwm yeej yuav nqov li qaws rais
    li lees rov fib qab, nes,


     


    Hnov
    tim yuas, kuv niam kuv txiv hmoob poj yawm nkawm txiv tuam mej zeeg tshwm,
    nkawm fwb cw, nes.


     


     


    Yog luag cev lub phaj tuaj rau koj es
    luag muaj nyiaj nyob rau hauv lub tuaj ntiav koj lawm no ces koj yuav hais ob
    txwm hauv qab no thiab hos yog luag tsis ntiav nyiaj no ces koj tsuas hais li
    saum toj no xwb os nawb,



     


    9,
    Hais zoov li kus, zoov li, laj tub sis yau wb muab cob li nkaus rau neb coj
    mus  kaw li nkaus rau nruab taig, qhib
    li  pho tuaj rau nruab hub, txawb li
    nkaus rau qab mus plaj cais, sawv li 
    tsees rau qab mus plaj cub, tawg paj ces nthuav li vus nyob mus ua
    nplais, txi txiv ces kom nrw hna nyob mus ua lub, zaum no ces me nkauj nyab
    nraug vauv los ua neej ces muaj lawm cuab leeg ntxhais, yim leej tub, nes,


     


    9,
    Hais zoov li kus, zoov li, laj tub sis yau wb muab cob li nkaus rau neb coj
    mus  kaw li nkaus rau nruab hub, qhib
    li  pho tuaj rau nruab taig, txawb li
    nkaus rau qab mus plaj cub, sawv li 
    tsees rau qab mus plaj cais, txi txiv kom nrw hna nyob mus ua lub, hos
    tawg paj ces  nthuav li vus nyob mus ua
    nplais, zaum no ces me nkauj nyab nraug vauv los ua neej ces muaj lawm cuab
    leeg tub, yim leej ntxhais, nes,


     


    10,
    Hais zoov li kus, zoov li, laj tub sis yau wb muab cob li nkaus rau neb tej mus
    quav npab, txais li nkaus rau tej mus quav tes, coj mus txawb li nkaus rau qab
    mus plaj xab, sawv li  tsees rau qab mus
    plaj tsev, yog tawg paj ces kom ncw cuag li paj hmab, hos  txi txiv ces kom nrw hna cuag li  txiv cev, ces me nkauj nyab nraug los ua neej
    ces yuav vam ntws xws xub ntab, nroo ntws xws xub mes, neej yuav zoo xws neej
    hmab, hos luag yuav qhuas cuag li neej cev, me nkauj nyab nraug vauv yuav tau
    txais daim ntawv meej tab, nyob mus muaj npe, zaum no me nkauj nyab nraug vauv
    tawm rooj li  plaws ces yuav muaj laj mej
    pej xeem tuaj txais sawv ua tsheej kab, tos ua tsheej kev, zaum no ces me nkauj
    nyab nraug vauv tsa muag zaj saib ces twb tau kav cuaj ntswg liaj ncab, yim
    ntswg ciav ntev, me nkauj nyab nraug vauv tus me qab vaj ces yuav muaj lawm
    cuaj txwg tub mab, sawv ua laj kab, tus qaum loog ces yuav muaj lawm yim txwg
    tub qhe, sawv ua laj kem, me nkauj nyab nraug vauv lub koob moo ces yuav ncha
    ntws nto plaws puag pem ceeb tsheej teb, nes


     


    10,
    Hais zoov li kus, zoov li, laj tub sis yau wb muab cob li nkaus rau neb tej mus
    quav tes, txais li nkaus rau tej mus quav npab, coj mus txawb li nkaus rau qab
    mus plaj tsev, sawv li  tsees rau qab mus
    plaj xab, yog txi txiv ces kom ncw cuag lit xiv cev, yog tawg paj ces kom ncw
    cuag li paj hmab, ces me nkauj nyab nraug los ua neej ces yuav vam ntws xws xub
    mes, nroo ntws xws xub ntab, neej yuav zoo xws neej cev, hos luag yuav qhuas
    cuag li neej mab, me nkauj nyab nraug vauv yuav tau txais daim ntawv muaj npe,
    nyob mus meej tab, zaum no me nkauj nyab nraug vauv tawm rooj li  plaws ces yuav muaj laj mej pej xeem tuaj
    txais sawv ua tsheej kev, tos ua tsheej kab, zaum no ces me nkauj nyab nraug
    vauv tsa muag zaj saib ces twb tau kav cuaj ntswg liaj ntev, yim ntswg ciav
    ncab, me nkauj nyab nraug vauv tus me qab vaj ces yuav muaj lawm cuaj txwg tub
    qhe, sawv ua laj kem, tus qaum loog ces yuav muaj lawm yim txwg tub mab, sawv
    ua laj kab, me nkauj nyab nraug vauv lub koob moo ces yuav ncha ntws nto plaws
    puag pem ceeb tsheej sab, nes


     


    Hnov
    tim yuas, kuv niam kuv txiv hmoob poj yawm nkawm txiv tuam mej zeeg tshwm,
    nkawm fwb cw, nes.
    avatar
    Npoos
    Guest


    zaj tshoob  Empty Thanks a lot

    Post by Npoos November 14th 2011, 5:26 am

    I like it so much, but I think you should have the MP3 sound with these scripts too.

     
    Tubzoonraug
    Tubzoonraug


    Registration date : 2009-12-15

    zaj tshoob  Empty Re: zaj tshoob

    Post by Tubzoonraug November 14th 2011, 3:01 pm

    Npoos,

    Kuv xav li thiab tiag, Tus nov xyov nws nyob tim Laos sub na, nws lo tso rauhauv nov tag xwb ces nws tsi tuaj lawm tab si nws nyiam nyob tom hmoob Fabkis lub "Hmoob Tshav Ntuj forum " xwb.

    Sponsored content


    zaj tshoob  Empty Re: zaj tshoob

    Post by Sponsored content


      Current date/time is March 28th 2024, 3:35 am