• Post new topic
  • Reply to topic

"Yog Tsis Muaj Kuv"

Share

sengpor

Registration date : 2016-03-15

"Yog Tsis Muaj Kuv"

Post by sengpor on March 20th 2017, 5:41 am

“Yog Tsis Muaj Kuv”
Yog tsis muaj kuv koj puas yuav quaj
Koj puas tuaj nyiav kuv tom ntxa
Koj puas nqa paj tuaj rau kuv
Koj puas uv ua tau ib siab
 
Txog xyoo tshiab koj puas muaj suab luag
Koj noj zaub tsuag puas yuav qab os
Koj puas tos thiab xav txog kuv
Sij hawm luv los ntev rau koj
 
Puas xav zoj thaum wb ua ke
Tej vaj tse puas yuav sov nyob
Yog koj mob puas muaj neeg saib
Thaum koj tshaib puas muaj neeg hlub
 
Tshav ntuj kub puas muaj tus roos
Thaum koj ntsoos puas muaj tus ntxias
Yog hais tias koj nyob ib leeg
Puas muaj neeg tuaj saib xyuas koj
 
Kev ua noj thiab kev ua haus
Puas yuav txaus kav koj dhau xyoo
Koj puas nroo txog kuv thiab nab
Es puas sab yog koj mus khwv
 
Koj mus kwv cav taws puas hnyav
Es puas kav koj rauv caij ntuj no
Puas yuav kho koj lub siab thiab
Puas nyuaj siab thiab puas ntxov plawv
 
Ntshe kuv sawv los pab tsis tau
Kuv yuav dhau mus ua av lawm
Lub sij hawm yuav tig tsis tau rov
Txawm koj qov koj quaj npaum cas
 
Qw kom tas koj lub suab kiag
Yuav ncaim tiag ntshe tsis sib pom
Es thov kom koj ho xav zoo
Muaj txoj hmoo wb thiaj sib ntsib
 
Los wb pib lub neej kom zoo
Txhob nroo nroo ua lub siab ntev
Ua niam tsev rub lub siab loj

Siab ntev coj lub neej yeej yuav zoo xwb os mog tus neeg kuv hlub aw…
  • Post new topic
  • Reply to topic

Current date/time is June 25th 2017, 6:57 am