"Plam Koj Vim Kev Kawm"

    Share

    sengpor

    Registration date : 2016-03-15

    "Plam Koj Vim Kev Kawm"

    Post by sengpor on March 17th 2017, 5:41 pm

    "Plam Koj Rau Luag Vim Kev Kawm"
     
    Yug los ua ib tug tub kawm
    txog sij hawm noj tsiab peb caug
    yeej tsis qaug rau kev ua si
    kawm txuj ci yog lub homphiaj.
     
    Es kuv thiaj tsis muaj sij hawm
    Uas yuav tawm mus tham hluas nkauj
    Tsis mus xauj Txog luag tej ntxhais
    Yeej tsis hais txog kev ua plees.
     
    Nyob ncaj ncees rau kev kawm paub
    Kev to taub kom paub txhij txhua
    kawm ib ncua Nce rau mos tsib
    kuv thiaj pib xav muaj tus hlub.
     
    Muaj ib hnub kuv tau mus tsev
    nyob tsis ntev tsis pes tsawg hmo
    phoojywg ho yaum mus ua si
    tsaus ntuj nti mus nrhiav hluas nkauj
     
    Thiaj mus xauj hmoob ntxhais thawj zaug
    kuv siab qaug vim nyiam koj heev
    kuv siab seev xav ntsoov txog koj
    siab xav zoj yuav mus kawm ntawv.
     
    ua siab sawv mus kawm ntawv dua
    los tseem tshua npau suav pom koj
    ua siab loj tias koj yuav hlub
    yuav tsis pub kuv kua muag ntws.
     
    kuv siab ntsws thiaj sau rau koj
    kev hlub loj ib qib zuj zus
    sib hlub mus tau ob peb xyoo
    Yam tsob ntoo uas pib tuaj cag.
     
    caij ntuj nag Pib hlav nplooj ntsuab
    yam tus nquab nrhiav tau chaw tsaws
    koj los daws kuv txoj kev ntshaw
    yam txoj saw tau kiag los coj.
     
    kuv hlub koj ib leeg xwb tiag
    thiaj puag kiag koj rau hauv siab
    tawm xyoo tshiab muaj lub suab luag
    tau koj puag zoo siab tiag tiag.
     
    los txog kiag xyoo kuv kawm tiav
    kuv tau txiav txim siab kawm toj
    kuv hais koj ua siab ntev tos
    kuv yuav los hlub koj ib leeg
     
    ntxim koj ntseeg kuv thiaj tso siab
    tawm xyoo tshiab kuv thiaj mus deb
    mus qab teb rau lwm teb chaws
    thiaj hla plaws ciam teb nplog lawm.
     
    yuav mus kawm rau wb lub neej
    kom thiaj tsheej ua neej xws luag
    so kua muag tsis xav hais lus
    kuv thiaj mus kawm tau ntev loo.
     
    tsis ntev xyoo kuv kawm tiav lawm
    txog sij hawm yuav rov los tsev
    yuav pua kev tuaj hais yuav koj
    kuv yuav coj koj nrog kuv mus.
     
    Kuv lo lus hais tsis tau tiav
    cas ua ciav muaj neeg hais tias
    ua siab txias txhob tu siab mog
    vim tias yog koj tus me hlub.
     
    raug luag rub mus ua nyab lawm
    koj mus kawm ntev ntev lawm ces
    lawv tuaj nqes tsev hais yuav lawm
    lub sij hawm twb dhau lawm os.
     
    koj txhob tos txog nws lawm mog
    kuv xav txog mas tu siab kawg
    ua pes tsawg los twb dhau lawm
    txoj kev kawm kuv npaj rau wb.
     
    es kuv twb npaj siab ua luaj
    cas kev quaj tseem raug kuv thiab
    me nploojsiab koj mus lawm tiag
    xav caum kiag los yuav tsis zoo.
     
    ua siab nroo so lub kua muag
    tshuav tsis tuag xwb ces zoo lawm
    txoj sij hawm tawm dua xyoo tshiab
    thiaj npaj siab mus kawm toj ntxiv.
     
    saib puas liv tau txoj kev nco
    tas li no kuv thiaj tuaj deb
    hla suav teb tuaj teb chaws no
    mam rau siab ntso kawm kom tiav.
     
    es saib puas muaj ib hnub kuv tau pab tus neeg kuv hlub
    xwb ces zoo kuv lub siab lawm oh.
    avatar
    Davdub
    member
    member

    Registration date : 2009-12-19

    Re: "Plam Koj Vim Kev Kawm"

    Post by Davdub on March 18th 2017, 10:32 am

    Brother,  ua tsaug raukoj  lub dag zog thiab os... Koj sau tau zoo kawg... rau siab sau tag zog xwb ma.. kom  cov nyiam nyeem tuaj nyeem thiab tuaj seev suab rau koj cov poem nawb.

    sengpor

    Registration date : 2016-03-15

    Re: "Plam Koj Vim Kev Kawm"

    Post by sengpor on March 18th 2017, 5:34 pm

    Davdub wrote:Brother,  ua tsaug raukoj  lub dag zog thiab os... Koj sau tau zoo kawg... rau siab sau tag zog xwb ma.. kom  cov nyiam nyeem tuaj nyeem thiab tuaj seev suab rau koj cov poem nawb.
    Ua li os

    twjcuab

    Registration date : 2016-07-23

    Re: "Plam Koj Vim Kev Kawm"

    Post by twjcuab on March 19th 2017, 12:21 pm

    Tub Sengpor:
    Xyoo 1971, kuv tus kheej twb raug ib zaug li koj zaj paj huam saum no lawm os;  tus teeb meem plam kev hlub vim txoj kev kawm:   Thaum lub sij hawm ntawd mas tseem tsis tau muaj xov tooj li tiam 21 no mas haj yam tsis hnov moo rau tom qab li os, txog thaum lub caij phav ntawv yus mam rov los txog tsev ces yus tej phooj ywg txiv neej mam hais tias yawg los mus lawm kiag tsis ntev xwb ces koj tus hluas nkauj twb mus yuav txiv lawm, ntshe twb mus tau 5 lub hlis lawm os phooj ywg peb yeej pab koj tu siab kawg thiab nws yeej tsis xav yuav nws tus txiv ntawd kiag li tab mas lawv tuaj nqis tsev hais ces - nws niam lawv cia li muab rau lawm xwb os phooj ywg. thaum yus hnov tej lus no mas yeej ua rau yus ob lub qhov muag tsaus ntais cuag li leej twg muab dab tsis coj los npog ntag ho!!! 
    avatar
    Davdub
    member
    member

    Registration date : 2009-12-19

    Re: "Plam Koj Vim Kev Kawm"

    Post by Davdub on March 19th 2017, 10:24 pm

    2 tug,  kuv tus kheej ce tsi muaj  dab neeg tseg rau lub ntiaj teb nov li os. Vim tsi tau ua nkauj ua nraug ib zaug li e tsi paub nco leej twg.. thaum paub  nyiam hlua nkauj ce txawm cia li yuav pojniam lawm xwb ce pim lo tsi pom paum lo tsi ntsib li os. U pom yus tus nkau xwb lo txog tam sim nov.. e thiaj li nyiag ntshi tham hauv fb  thiab whatapp  rau cov nkauj mog tim LPDR ma..  yog  tau daj deev yav thaum thiab muaj hlua nkauj yav thaum lawm ce yuav tsi  xav lawm thiab. Tab si tsi muaj dua ce tseem pib  xav xwb..



    twjcuab

    Registration date : 2016-07-23

    Re: "Plam Koj Vim Kev Kawm"

    Post by twjcuab on March 19th 2017, 11:44 pm

    Nyob zoo tub Dadub:


    Ua neej nyob ces yeej tsis muaj leej twg yuav paub ua ntej hais tias yus lub neej yav tom ntev yuav zoo li cas, nyob ntawm txoj hmoo li tej laus ib txwm hais tseeg tiag tiag ov.
    avatar
    Davdub
    member
    member

    Registration date : 2009-12-19

    Re: "Plam Koj Vim Kev Kawm"

    Post by Davdub on March 20th 2017, 3:23 pm

    Tij Twj Cuab,


    Yeej yog li koj hai kawg.. 3 ua neeg nyob nov ce yeej tsi po tag kis.. yam yus paub ce yog yav tag lo lawm nkau xwb.

    Sponsored content

    Re: "Plam Koj Vim Kev Kawm"

    Post by Sponsored content


      Current date/time is June 20th 2018, 4:26 am