"Hlub Koj Yuam Kev"

    Share

    sengpor

    Registration date : 2016-03-15

    "Hlub Koj Yuam Kev"

    Post by sengpor on November 9th 2016, 5:23 am

    “Hlub Koj Yuam Kev”


    Thaum nyuam qhuav ntsib koj thawj zaug
    Koj zoo nraug kuv siab tag nrho
    Txhua txhua hmo wb tham luag ntxhi
    Kev ua si lom zem xaus npo
     
    Yeej tsis nco kho kuv lub siab
    Txog xyoo tshiab koj txawm pib hloov
    Tsis nco ntsoov thaum nyuam qhuav ntsib
    Koj tau pib ua txoj kev phem
     
    Pib rhuav tshem wb txoj kev hlub
    Koj siab dub thiab ua siab nyoos
    Pom koj ntsoos txhua hnub txhua hmo
    Koj tsis nco wb tej qub lus
     
    Koj thiaj mus ua raws koj siab
    Pom tus tshiab ntshe kuv yuav mus
    Nrhiav dua tus vim hlub koj yuam kev
    Ua siab ntev tsis taus ntxiv lawm
     
    Lub sijhawm dhau mus zuj zus
    Nrhiav lwm tus ntshe yuav zoo dua
    Kev hlub tshua cia ua npau suav
    Koj tsis yuav li kuv hais ces
     
    Kuv tso tes yuav tsis cheem koj
    Mam siab loj nrhiav dua tus tshiab
    Tawm xyoo tshiab mam ua siab tso
    Es txhob nco thiab txhob xav txog
     
    Kuv lawm mog tus neeg siab dub
    Koj tsis hlub ces kuv yuav mus
    Hlub lwm tus tseg koj nyob nawb
    Lub siab dawb kuv pub rau koj
     
    Cia muab zoj ua koj chaw tshua
    Kuv yuav ncua mus yuav tsis nrov
    Yog koj hnov kuv tej lus no
    Tsis txhob nco thiab tsis txhob tos
     
    Kuv tsis los lawm mog leej muam
    Tsis xav yuam lwj siab nrog koj
    Rub siab loj mam nyob koj nawb
    Es sib lawb txij hnub no mus
     
    Nrhiav dua tus uas haum koj siab
    Nrhiav tus tshiab los hloov kuv chaw
    Tus koj ntshaw koj thiaj xav hlub
    Hmoob leej tub ua ib siab mus lawm os mog me nkauj hmoob….

      Current date/time is August 16th 2018, 2:46 am